தமிழ் இனி “மெல்ல” வளரும்!

அக்கரைப் பச்சை இக்கரைக்கும் உண்டு, அக்கரையிலிருந்து

2012-02-06T22:03:00.001-08:00

அக்கரை என்றுமே பச்சை அதனாலே

அக்கரை நின்றால் அழகாய் தெரியுமே

இக்கரை, நீயுணர என்றும் இனித்திடும்

சக்கரை போலாகும் வாழ்வு

வெண்பா பைத்தியம்…

2012-01-19T19:00:00.000-08:00

சும்மா கிடந்த சங்கை ஊதிக்கெடுத்தாற் போல, என்னுடைய நண்பர் இராசா என்னை வெண்பா இலக்கணம் பற்றி ஏதோ கேட்கப் போக, பரணில் தூங்கிக்கொண்டிருந்தவெண்பா பிசாசு என்னை மீண்டும் பிடிக்க, உடனே ஒரு வெண்பா!

இது ஒரு விகற்ப இன்னிசை வெண்பா… வெண்பாக்களுக்கே உரியவை, “இதனால் இது” என்கிற காரண விளக்கங்களும்அல்லது “எதனால் இது” என்கிற கேள்வி-பதில்களும் அல்லது “இவ்வாறிருக்க அவ்வாறு ஏன்”என்கிற காரணம் ஒற்றிய கேள்விகளும்!

அந்த அடிப்படையை ஒட்டித்தான், எண்ணம் எப்படி வாழ்வைப் புதுக்குகிறது என்றுஎழுதியதும். திருத்தணிகை விசாகப்பெருமாளையர் அவர்கள் எழுதிய யாப்பிலணக்கண நூலைப்ஒருமுறை படித்து சரிபார்த்துக்கொண்டேன்..

பண்ணிலாமல் பாடலுண்டோ கண்ணிலாமல் காட்சியுண்டோ

உண்ணிலார்க்கு ஊட்டமுண்டோ எண்ணிடாது ஏற்றமுண்டோ

வண்ணமுதாம் வாழ்வினிலே எண்ணிறந்த இன்பமுண்டே

எண்ணியென்றும் வாழுவதே வாழ்வு

தந்திரப் பேச்சு -- கவிமாமணி இளையவன்

2012-01-18T19:00:00.000-08:00

[நான் இரசித்த சில கவிதைகளை இங்கு பகிர்ந்து கொள்ள விழைகிறேன். மின்பெருவெளி வலையிலே, எத்தனைச் செல்வங்கள் கொட்டிக்கிடக்கின்றன? எத்தனை சிந்தனையாளர்கள் எவ்வளவு இலகுவாக எழுதுகிறார்கள். வெண்பா எழுதுவது பற்றி நண்பர் ஒருவரோடு பேசிக்கொண்டிருக்கையில், வலையில் "வெண்பா வடிக்கலாம் வா" என்கிற ஒரு குழுமம் உருவாக்கப்பட்டு, வெகு நாட்களாக நான் தொடர்பில்லில்லாத என்னுடைய "தென்றல்" துவக்ககால நண்பர் திரு. வாஞ்சிநாதனை நினைவு கூர்ந்து, வலையில் தேடும்போது வாஞ்சியைக் காணவில்லை; ஆனால் வாஞ்சையுடன் என்னை எண்பந்தைந்தாம் வருடம் டொராண்டோ நகரில் ஒருநாளை பகிர்ந்துகொண்ட மதிப்பிற்குறிய மின்னணுவியல் துறை பேராசிரியர் பசுபதி தானுமுவந்து பகிர்ந்துகொண்ட கவிதை இதோ...! கவிமாமணிஇளையவன்.. அவர் தமிழே இனிமை, இளமை – யாருக்கும் இளைக்காத புலமை! நீங்களும்ரசிக்கலாமே!]

தந்திரப் பேச்சு -- கவிமாமணி இளையவன்

போஜன் என்பவன் ஒர்அரசன்

புலவர் போற்றும் பேரரசன்

பூஜை எல்லாம் சிவன்மேலே

பொழுதும் நினைவு அவர்மேலே

ஏழை ஒருவன் "சிவபெருமான்"

எங்கும் இல்லை" எனச்சொன்னான்

வாழை மரபாய்க் கொடைத்தன்மை

வாய்ந்தோன் போஜன் இதைக்கேட்டான்

"சிவனை இல்லை என்கின்றாய்,

சொல்வது எப்படி" எனக்கேட்டான்

அவனோர் ஏழை ஆனாலும்

அறிவின் திறனால் விடைசொன்னான்

சங்கர நாரா யணன்எனவே

சங்குத் திருமா லிடம்பாதி

அங்கம் தந்தார் மீதியினை

அன்பாய்ச் சக்திக் களித்திட்டார்

இரண்டு பாதி போனதனால்

இனிமேல் சிவனார் "ஏ'தென்றான்

அருமை விளக்கம் எனப்போற்றி

அரசன் கேள்வி சிலகேட்டான்.

சந்திர கலையது எங்கென்றான்

சந்தி ரனிடமே போச்சென்றான்

விந்தை! கங்கை எங்கு' என

"வந்தே சங்கம் இங்"கென்றான்

சிவனின் வீரம் எங்கென்றான்

சேர்ந்தது உங்களை எனச்சொன்னான்

தவழும் திருவோ டெங்கென்றான்

தனதே அதுவென விடைசொன்னான்

ஏழையின் கையில் திருவோடு;

ஏந்தல் பார்த்தான் கனிவோடு

வாழும் தந்திரப் பேச்சுக்கு

வரிசை அளித்தான் மகிழ்வோடு !

இயற்கை

2012-01-16T22:00:00.000-08:00

[இன்றுஒரு கவிதை.."தானே"புயலுக்குப்பிறகு நடக்கும் அரசியலைப்பற்றி ஒரு செய்தியைப் படித்தேன்.அதன்பாதிப்பில் எழுத தொடங்கியகவிதை அனுமன் வால் போல் நீண்டுகொண்டே போக,வழக்கம்போல் பொசுக்கென்று முடித்துவிட்டேன்..இன்னும்எழுதிப் பழக வேண்டும்!]

ஆறறிவுமனிதர்களின் ஆரவாரப் போலித்தனம்

ஓரறிவு மில்லாத இயற்கையிலே இருக்கவில்லை

மனிதசக்திஅறியவொண்ணா மாசக்தி ஐந்தனிலும்

கனிவுமுண்டுகடுஞ்சீற்றக் கூற்றாகிக்காய்வதுண்டு!

ஆனாலும்அங்கேயோர் மதமென்ற பேதமுண்டோ?

வீணாகஇனமென்றும் மொழியென்றும்கூச்சலுண்டா?

நிலமதிர்வும்கடற்கோளும் பேய்க்காற்றுப்பெரும்புயலும்

நீர்மலிந்துபெருவெள்ளக் காடாகும்நிலையதுவும்,

தீயெழுந்துஎரிமலையாய் கொதிகுழம்பாய்ச்பொழிவதுவும்,

வேர்பிடுங்கிஎறிந்திவரை அடியோடு அழித்திடுவோம்,

மாயட்டும் மாற்றுசாதி - வாழட்டும் நம்சாதி

என்கின்றவன்மத்தின் வெளியீடாய்இருப்பதில்லை!

கன்மத்தின்குறியீடாய் கதைசொல்வர்ஒருமதத்தார்!

இயற்கைதரும்ஜிக்ஹாதி எனமுழங்கும்ஒருமதத்தார்!

மயக்கமின்றிதெளிவீரே தீர்ப்பிடுநாள்வெகுவிரைவில்

மீட்பரிங்குவரவேண்டி பாவிகளே மாறிடுவீர்!

தயக்கமின்றிதெரிவிப்பார் தேவதூதன்கட்சியினர்

கேட்பவர்கள்கேட்கநெய்யும் கேப்பையிலேவடியுதென்பார்.

முயற்சியின்றிமுயங்கிமூலை முடங்கிமக்கள்இருப்பரென்றால்

தடியெடுக்கும்தண்டல்காரர் படியளக்கும்பகவனாவார்

படிந்தால்பார்இல்லையெனில் பரலோகம் உனக்கிருக்கு!

அரசின்வழிஅறவின்வழி என்றகாலம் கடந்தகாலம்!

அரவின்வழி,அடக்குமுறை,எதிர்த்தாலேஅழிக்கும்வழி!

உறவின்வழிபிழைக்கின்ற ஊரேய்க்கும்பிழைகள்பல

சிறப்பாகசீரழிக்கும் சிங்காரம்இக்காலம்.

ஆயிரமாய்ஜாதியிங்கு இருந்தாலும்அன்னியர்கள்

புகுவதென்னநீதியென்ற பாரதியும், நம்மவரே

தாயனையதேசமிதை துகிலுரியும்துச்சர்களாய்

மிகுநீசமோசர்களாய் போவரென அறிந்திருந்தால்

வெதும்பித்தான்மாய்ந்திருப்பான் வெற்றாகபோனதென்று!

இதுஎன்னால்பொறுப்பதில்லை வெந்தீயில்தீயட்டும்

எழுதியவென்வலக்கையும் உலக்கையென ஆகட்டும்

பழுதுபட்டசமுதாயம் பாழாகப் போகட்டும்

என்றல்லோமனம்வெறுத்து சலித்திருப்பான்?சபித்திருப்பான்?

அன்றேதன்தமிழாலே "அறம்"பாடிஅழித்திருப்பான்.

மதத்தாலும்மொழியாலும் நிலத்தாலும்நீராலும்

உதவாதபலவாத பிடிவாத மடமைகளால்

விடமாகவளர்ந்திருக்கும் பிளவாக்கும்மனப்போக்கும்

முடமாகி உயிர்ப்பின்றி ஜடமான நிலையதுவும்

மாறிநம்மில்புதுநோக்கும் புத்துணர்வும்பிறந்திடவே

சீறியதாய்புதுவாழ்வு மலர்ந்திடவேஇயற்கையெனும்

தாயவளின்வீரியமே பிரளயமதாய் பொங்கட்டும்!

நேயமுடன்மீண்டுமனிதம் புனிதமுடன்மலரட்டும்!

சென்னை கச்சேரி மேளா 2011-2012 - 001

2011-12-04T06:15:00.001-08:00

டிசம்பர்3,2011

டிசம்பர்முதல் தேதியே சென்னை ஸீசன்ஆரம்பித்துவிட்டது.கார்த்திக்ஃபைன் ஆர்ட்ஸ்,நாரதகானசபாவில் கச்சேரி ஸீசனைஆரம்பித்து வைத்துவிட்டாலும்,நானும்இந்தவருடம்,நவம்பர்இறுதி வாரத்துக்கே சென்னைவந்துவிட்டாலும்,சிலகாரணங்களால்,இன்றுதான்என்னால் முதல் கச்சேரிக்குசெல்ல முடிந்தது.

என்னுடையகச்சேரிக் கணக்கு அபிஷேக்ரகுராம்,மற்றும்டி.எம்.க்ருஷ்ணாஇவர்களுடன் ஆரம்பித்தது.நானும்,அண்ணாவும்கச்சேரி அரங்கத்துள் நுழையும்போது,அபிஷேக்தன்யாஸி பாடிக்கொண்டிருந்தார்.போனவருடமே எழுதியிருந்தபடி,அபரிமிதமானகுரல் வசதி,நினைத்ததை,நினைத்தஅதே நொடியில் குரலில்கொண்டுவரக்கூடிய அசாத்தியஉழைப்பு, அதற்குஈடான ஜெட்வேக கற்பனைச்சரவெடிகள்,அவற்றைகையாளும் லாவகம் என்று அபிஷேக்மிரட்டுகிறார்.

ஒருபெரிய ரோலர்கோஸ்டரில் தொடர்ந்துஇரண்டு மூன்று முறை சென்றுவந்தார்போல சில சமயம் நமக்கு அயற்சிஏற்பட்டு விடுகிறது.ராகத்தில்ஓரளவாவது இருந்த விஸ்ராந்தியும்சௌக்யமும்,தானத்திலும்,பல்லவியிலும்இல்லை.திஸ்ரத்ரிபுடையில்,கண்டநடையில்,“இனிஒருகணம் உனை மறவேன் யதுகுலதிலகா நான்"என்கிறபல்லவி வரிகளை உருட்டியும்மிரட்டியும்,ஓடியும்சாடியும்,உருண்டும்பிரண்டும் அபிஷேக் பாடியதுபிரமிக்கும் படியாக இருந்தும்,ரசிக்கும்படியாக இல்லை. தன்யாஸியிலிருந்து,ஸ்ரீரஞ்சனிபின்பு பூர்விகல்யாணி என்றுதானத்திலும்,பல்லவியிலும்,பிறகுஸ்வர கல்பனையிலும் பாடியதுரசிக்கும் படியான விஷயம்தான்.ஆனால்அந்த வேகம்,கற்பனைகளில்அழகுக்கும்,அதைரசிப்பதற்கும்,குந்தகமாக அமைந்ததுதான் வருத்தத்துக்குரியது.

அபிஷேக்,அவரதுகுரலை பொன்போல் காக்க வேண்டும்,இளமையின்வேகம், அளவுக்குமிஞ்சிய குரலுபயோகம் இரண்டுகுரல்நாணை பாதிக்காமல்பாதுகாக்கவேண்டியது அவரதுகடமை.

பின்னால்வந்த குதம்பை சித்தர் பாடலும்ஏறக்குறைய கழைக்கூத்தாடிவிவகாரம்தான்.விவகாரத்தில்விதரணையை விட்டுவிடக்கூடாது.இறுதியாகப்பாடிய "சிதம்பரம்போகாமல் இருப்பேனோ"வும்சலிப்புத்தட்டும் அளவுக்குமேல் கீழ் சஞ்சாரங்களுடன்.ஆத்மவிசாரமாக,பரிதவிப்புடன்பாடிய சாஹித்யத்தை அகடவிகடமாகசெய்தது ஏனோ ரசிக்கவில்லை.

கச்சேரியென்பது, கைதட்டல்கள்மட்டுமில்லை என்பதை இன்றையமுன்னணி நட்சத்திரக் கலைஞர்கள்உணரவேண்டும்.

வயலின்வாசித்த மைசூர் ஸ்ரீகாந்தும்,மிருதங்கநெய்வேலி நாராயணனும்,கஞ்சீராகோபாலக்ருஷ்ணனும் அனுசரணையாகஈடுகொடுத்தது கச்சேரியின்நிச்சயமான ஆறுதலான அம்சம்.

அடுத்துவந்தடி.எம்.க்ருஷ்ணாவின்கச்சேரி.லயச்சக்ரவர்த்திகாரைக்குடி மணி மிருதங்கம்,ராமானுஜாசார்யுலுவயலின் துணையுடன் ஆரம்பித்தகச்சேரி,மிகவும்மோசமான மைக் அமைப்பின் காரணமாக,சரியாகசமன் செய்யப்படாது,மேடையில்இருந்தவர்களுக்கும் அவஸ்தை..அரங்கத்திலிருந்தரசிகர்களுக்கும் அவஸ்தை.

க்ருஷ்ணாவின்பளிச் குரல் இன்று கொஞ்சம்மந்தமாகத்தான் இருந்தது.மைக்கட்டாயம் 50வதுவிழுக்காடாவது இதற்குக்காரணம்.ஆரம்பத்தில்.நீலகண்டசிவனின்,என்றைக்குசிவ க்ருபை வருமோ என்கிறமுகாரி ராகக் கீர்த்தனயுடன்,செளகமாக,செளக்யமாகஆரம்பித்த கச்சேரி,ஸாரங்காவில்அருணாசல நாதம் கீர்த்தனையுடன்மெதுவாக க்ருஷ்ணாவில் குரலில்சூடுபிடிக்க வைத்தது.ராகம்பாடியதில் வந்த சங்கதிகளேஅடிக்கடி வந்தது தவிர்க்கப்பட்டிருக்கலாம்.ஆனால்கீர்த்தனை பாடியது கச்சிதம்.

அடுத்துராகம்பாடாமல்,ரீதிகௌளையில்,”த்வைதமுஸுகமா அத்வைதமு ஸுகமா'என்கிறத்யாகராஜ க்ருதி.இதில்"ககன”-வில்பாடப்பட்ட நிரவல் செம்மங்குடிரகம்.முழுக்கமுழுக்க வார்த்தைச் சிதைவுகளுடன்.ஆளுமைபிரமிப்பு,ஆனால்படைப்பு க்ருதியின் வார்த்தைஅழகுகளுக்குச் செய்யப்பட்டஅநீதி. "ககன,பவன,புவன, தபன,ஆதி"(ஆகாயம்,காற்று,நெருப்பு,நீர்,புவி)என்றவார்த்தைகளை இதற்குமேலும்சிதைத்திருக்க முடியுமாஎன்பது சந்தேகம்தான். சும்மா,"ககனகககபவனகக ககககக"என்றுஒரு 3நிமிஷம்சொல்லிப்பாருங்கள்.

த்யாகராஜர்மன்னிப்பாராக. அவர்மன்னித்தால் என்ன? ரசிகர்கள்கைதட்டினார்களே என்றுகேட்கலாம்..பெரும்பாலானரசிகர்கூட்டத்துக்குவேண்டியதெல்லாம்,அவர்கள்கேட்பதெல்லாம் எடுப்பானஎடுப்பு,வேகமானதொடுப்பு, அதிரடியானமுடிப்பு!என்கிறமேஜிக்தான்.அர்த்தபாவம்எல்லாம் அவர்களுக்கு அநாவசியம்.தெலுங்குதானே,நன்றாகக்கெடுக்கட்டும் என்கிற மனோபாவமோஎன்னவோ..!க்ருஷ்ணாநல்ல கலைஞர்தான்!ஆனால்கைத்தட்டல்கள் ஆதிக்கத்திலும்,புகழ்தரும் போதையிலும் இருக்கிறார்.தன்னம்பிக்கைக்கும்,"தான்"என்பதற்கும்வித்தியாசம் அவருக்குத்தெரியாதா என்ன? காலம்பெரிய சமனி.இவரையும்மீட்டு கொண்டுவரும் என்றுநம்புவோம்.

வார்த்தைகளின்பொருளுக்கேற்ப அங்க அசைவுகளோ,கைவீச்சுகளோ இருந்தால் குற்றமில்லை.பாடகர்களின்சங்கதிகளுக்கு அவர்கள் கைவீச்சு,தலையாட்டல்கள்ஓரளவுக்கு உதவுவது வாஸ்தவம்தான்.ஆனால்,என்றைக்குசிவக்ருபை க்ருதியில் வரும்இந்த வரிகளின் போது,வயலின்அல்லது மிருதங்க வித்வான்கள்பக்கம் கையைக்காட்டுவது,அனர்த்தமாகிவிடுகிறது.“ கண்டாலும்பேசார்!இந்தகைத்தவமான பொல்லாச் சண்டாளஉலகத்தைத் தள்ளி ஸத்கதி செல்ல" குறிப்பாக,"சண்டாள"என்னும்போது,வயலின்பக்கமோ,மிருதங்கம்பக்கமோ,அல்லதுரசிகர்கள் பக்கமோ கையைக்காட்டினால்...?

இதுக்ருஷ்ணாவுக்கு மட்டுமல்ல,கைவித்தையிலேகைதேர்ந்த அனைத்து வித்வான்கள்,விதூஷகிகளுக்கும்தான்.

நேரமில்லாதகாரணத்தினால் வெளியே வரவேண்டியகட்டாயம்.முழுகச்சேரியையும் கேட்க முடியவில்லை.ஒருவேளை,நான்கிளம்பியபிறகு,கச்சேரிமிகவும் நன்றாக இருந்ததோஎன்னவோ..!மீண்டும்கேட்காமலா போய்விடுவேன்?

ஏழாம் அறிவும் போதிவர்மனும்

2011-11-04T10:32:00.000-07:00

சமீபத்தில்மிகவும் பெரிய அளவில் விளம்பரம்செய்யப்பட்டு, தீபாவளிவெளியீடாக வந்திருக்கும்ஏழாம் அறிவு படத்தைப் பார்த்தேன்.

எங்கேஇதைப்பற்றி உண்மையான விமரிசனத்தைஎழுதினால், நமக்குஆறாம் அறிவே இல்லையோ என்றுநினைப்பார்கள் என்று பலரும்ஒதுங்கியிருக்கலாம்..அல்லது தமிழனே இல்லையென்றுமுத்திரை குத்தி, ஐந்தறிவுமிருகங்களுக்கும் கீழாகஎண்ணி விடுவார்களோ என்றுபயந்திருக்கலாம்..

தமிழனின்பெருமையைத் தூக்கி நிறுத்தியிருக்கிறமுயற்சி என்ற சுயதம்பட்டத்தைகாதுகள் கிழியுமளவிற்குஉரத்து அடித்திருப்பதினால்,என்னுடைய பார்வையில்இப்படத்தைப் பற்றிய சிலசெய்திகளைப் பதிவு செய்கிறேன்.

படம்,

பணத்தைஎண்ணாமல் செலவு செய்திருக்கும்தயாரிப்பாளரின் தாராளத்தைக்காட்டுகிறது. (அதுசரி! யார் வீட்டுப்பணம்!தூக்கி நிறுத்ததாத்தாவின் சேனலும்,உறவுக்கார ஸன்சேனல்களும் இருக்க எமக்குஎன்ன கவலை)

சூரியாவின்மெருகான அழகை, ஈடுபாட்டை,உழைப்பைக் காட்டுகிறது..போதிதர்மன் இப்படித்தான்இருந்திருக்கவேண்டும் என்றுஎண்ணவைக்கிறது..

ஸ்ருதிஹாஸனின்புதுமலரைப் போன்ற அழகைக்கவிதையாகக் காட்டுகிறது.

“தாமோ"என்று சீன, ஜப்பானியமற்றும் கீழை நாட்டு புத்தமதத்தினர்கொண்டாடுகிற, நம்மில்பலருக்கும் தெரியாத பாரதப்பூர்விகரான போதிதர்மரான,போதிவர்மன் என்பவரைநமக்கு பெருமையுடன் அறிமுகம்செய்து வைக்கிறது.

இதைப்பற்றிச்சொல்லவேண்டும் என்கிறஇயக்குநரின் ஆர்வத்தைக்காட்டுகிறது. (முருகதாஸ்நல்ல இயக்குநர் என்பது,அவரெடுத்த பார்த்திபன்கனவே காட்டிக்கொடுத்து. ஆனால் இப்படமோ, அவரது ஆர்வக் கோளாறைத்தான் காட்டுகிறது. ).

அழகான ஒளிஓவியம் (நல்ல சொல்லுக்கு நன்றி தங்கர்பச்சான்), பாராட்டப்படவேண்டியகலை இயக்கம் என்று பல நல்லவிஷயங்கள்இருந்தும், நிறைவான,முழுமையான, நம்பத்தகுந்தஆராய்ச்சியில்லாத, டாக்குமெண்ட்ரியா,ஹாங்காங்கிலிருந்துஇறக்குமதி செய்யப்பட்டமூன்றாம் ரக குங்ஃபூ படமா, அல்லது தமிழரின் பெருமைக்காக எடுக்கப்பட்ட பிரச்சார படமா என்றுதெளிவில்லாமல், செல்லும்படமாகத்தான் தெரிகிறது.

போதிதர்மன்,காஞ்சியை ஆண்ட பல்லவஅரசனின் மூன்றாம் இளவரசன்என்கிற முதல் தம்பட்டம் -இதைப்பற்றி சற்றுபார்ப்போம். எந்தஅரசன்? அவனுடையமற்ற பிள்ளைகள் என்ன ஆனார்கள்?எந்த நூற்றாண்டு என்றகேள்விகள் வெகுவாக தவிர்க்கப்பட்டு,கேள்விகளைக் கேட்காமல்நாங்கள் சொல்வதை ஒத்துக்கொள்ளுங்கள்என்று சொல்லியிருக்கிறார்கள்.. வலியுறுத்திக்கேட்டால், இல்லையே, நாங்கள்வலை, இணையத்தளங்களைஆதாரமாகக் காட்டியிருக்கிறோமேஎன்று சொல்லலாம். இணையதளங்கள் எல்லாம் வலுவான ஆராய்ச்சித்தலங்கள் அல்ல.

பல்லவர்களைப்பற்றியஆராய்ச்சி இன்னும் முடிவுறாதஒன்று. நமக்குத்தெரிந்த பல்லவர்கள், ஆறாம்நூற்றாண்டினைச் சேர்ந்தசிம்ஹவிஷ்ணு, அவனுடைபுதல்வனும், சமணத்திலிருந்துசைவத்துக்கு மாறிய மஹேந்திரவர்மன், மற்றும்அவனுடை புதல்வனான மாமல்லபுரத்துகதாநாயகனான நரசிம்மவர்மன்என்று நீண்டு, சோழர்கள்வந்தவுடன் சுருங்கி, பின்புமறைந்தேவிட்டது.

சிம்ஹவிஷ்ணுவின்தந்தை மூன்றாம் சிம்ஹவர்மன்(முதல் இரண்டுசிம்ஹவர்மர்கள் முந்தையதலைமுறைகளில் இருந்திருக்கவேண்டும்), மற்றும்அவனுடைய தந்தை இரண்டாம் விஷ்ணுகோபன் (முந்தையமுதல் விஷ்ணுகோபன்இருந்திருக்கவேண்டும்)என்று சரித்திரப்பெயர்கள்கேள்விப்படுகிறோமே (தகவல்:விக்கிபீடியா),அவர்களைப் பற்றிவிவரணங்கள் தெரியவில்லை.சிம்மவிஷ்ணுவின்காலமே, உத்தேசமாககி.பி. 555-590 என்றுசொல்லுகிறார்கள்.. மேலும்தமிழர்களின் இருண்டகாலமாகச்சித்தரிக்கப்படும் (சைவமும்,வைணவமு ஒடுங்கியிருந்து,ஜைனமும் பௌத்தமும்முன்னிருந்த காலமாக இருந்தததினால்முன்வைக்கப் பட்ட கருந்து) களப்பிரர்களிடமிருந்துதமிழகத்தை மீட்டவன் அவனிசிம்ஹன்என்று புகழப்பட்ட சிம்மவிஷ்ணு,மற்றும் பாண்டியன்கடுங்கோன். அதற்குமுந்தைய பல்லவர்கள் என்றுவைத்துக்கொண்டாலும் அவர்களும்ஒரு நூறு ஆண்டு கால அளவில் குறுகி4ம், 5ம்நூற்றாண்டுகளில் வந்துவிடுகிறார்கள்.. போதிவர்மனோ, 6 ம்நூற்றாண்டிலேதான் சீனாவுக்குசென்றதாக, ( 550 களில்),அவர்களின் குறிப்பும்தெரிவிக்கிறது.

சரித்திரத்தகவல்களேசிதறுண்டு, ஆராய்ச்சியாளர்களின்பார்வைகளில் வேறுபட்டுஇருக்கையில் எந்த பல்லவனைப்பற்றி பேசுகிறார்கள் படத்தில்?சீன சரித்திரத்தகவல்களும், பின்வந்தபல நூற்றாண்டுகளில், சென்பௌத்த மத ஆசிரியகளால் மேல்பூச்சுபூசப்பட்டு கோர்க்கப்பட்டகதைகளாகவே கருதப்படுகின்றன்..அவர்களும் ஒத்துக்கொள்ளுகிறஒரு சரித்திரத் தகவல்,போதிதர்மன் இந்தியாவிலிருந்து,தென்னகத்திலிருந்து,வந்த ஒரு மனிதன்என்பதுதான். காஞ்சிபுரம்,பல்லவ இளவல் என்பதெல்லாம்பிற்சேர்க்கையாகக் கூடஇருக்கலாம்!) எனக்கும்கூட அவன் தமிழனாக இருக்கக்கூடாதாஎன்கிற ஏக்கமுண்டு.

தவிரபல்லவர்களே, மத்தியஇந்தியாவிலிருந்து வந்த, பாலி மொழியும்சமஸ்க்ருதமும் பேசிய ஒருகுடி என்கிற ஆராய்ச்சியும்இருந்திருக்கிறது. அவர்கள்முழுக்கத் தமிழர்களாகஇருந்திருப்பது சந்தேகமே.பிற்கால தெலுங்குசோழர்களைப் போல அவர்களும் தமிழைவளர்த்திருக்கலாம், ஆனால்அக்மார்க் தமிழர்கள் என்றுசொல்வது உறுதிச் செய்யப்படாத,இதுவரைக்கும் முடியாத,ஆராய்விலே முடிவுறாதவீண் தற்பெருமை மட்டுமே!

ஏதோஒட்டுமொத்த இந்தியாவின்மருத்துவம், தற்காப்புக்கலைகள்இங்கிருந்து சென்ற போதிதர்மனோடு,சீனதேசத்துக்குச்சென்றுவிட்ட மாதிரி பேசுவதுஅபத்தம்.. ! "மீதிவர்மர்"களேஇல்லையா? குறைந்தபட்சம் "பாதிவர்மர்கள்'" கூடவாஇல்லை? அவர்களுக்கும்எதேனும் வைரஸ் தாக்கி, அழிந்துவிட்டார்களா? அவன் சென்ற பிறகுவந்த நூற்றாண்டுகளில் இருக்கும்இலக்கியங்கள் காக்கப்பட்டிருக்கின்றன, இந்தகலை மட்டும் முற்றாக அழிந்துஒழிந்து போனதா? குறைந்தஅளவு, பின்னாள்சோழர்கள், நாயக்கர்கள்காலம் வரையாவது இருந்திருக்கவேண்டுமே! இன்றும்கூட வர்மக்கலை இருப்பதாககேள்விப்படுகிறோமே.! ஏன்பரவலாக வெளியில் வரவில்லை?

நோக்குவர்மம் என்பது இப்போது நாம்வர்மக்கலையினைத் தேடி எடுத்துகொண்டாடும் விஷயம். இதைமிகவும் அற்புதமாக, தற்காப்புக்கலையின்ஒரு உயர்ந்த விஷயமாக சுமார்முப்பது ஆண்டுகளுக்கு முன்வந்த"ஷாவோலினின் 36ம்வகுப்பறை" என்றபடத்தில் காட்டியிருப்பார்கள்.அதன் உயர்வை ஒருமூன்றாம் தர வில்லனின் கையில்கொடுத்து, ஏதோ ஏக்கப்பார்வையிலேயே (பாதிதூக்கப் பார்வை போல இருக்கிறது)எல்லோரையும் அழிக்கிறகருவியாக சித்தரித்திருப்பதுகொடுமை!

பிறகுஅறிவியல், மரபணுஆராய்ச்சி, அதைசெய்யும் ஸ்ருதிஹாஸனின் அதீததமிழ் ஆர்வம் (தத்திதத்தி தமிழில் பேசும் தங்கபாப்பா!), மீண்டும்போதிதர்மனை கொண்டுவரஉருவாக்கப்பட்ட போதிதர்மன்பரம்பரையிலே வந்தவரான சர்க்கஸ்சாகஸக்காரர் அர்விந்த்,இதற்கெல்லாம் சிகரம்வைத்தால் போல், சீனாவின்இந்திய ஆக்ரமிப்பு முயற்சி,அதற்காக உருவாக்கப்பட்டடாங் ஈ (டான்கியா?), அவருக்குத் துணைபோகும், சீனாவுக்குவிலைபோன இந்திய விஞ்ஞானிரங்கநாதன், கொஞ்சம்காதல், நிறைய சண்டை,ஹாரிஸ் ஜெயராஜின்பூகம்பத்தில் பாதிக்கப்பட்டபாத்திரக்கடை களேபர ஓசை(இசையென்பதுசரியில்லை!) என்றுஒரே அமர் களம்தான் படம் ('க்'விடுபட்டிருப்பதைகவனிக்க!). ஒரு பாட்டு,சுமார் ரகம். ஆனால்கேட்ட மெட்டுபோல தோற்றம்.ஆனாலும்.. ரொம்பத்தான்பில்ட் அப்பு!

கடைசீயில்,சூர்யாவை வைத்துபிரசாரப் பேச்சு, அதைமானிடரில் பார்த்துக்கொண்டிருக்கும்முருகதாஸ் என்று படம் முடிகிறது.நெட்டி முறித்துக்கொண்டுஎழுந்தபோது, அப்பாடாஎன்று இருந்தது..! முருகதாஸின்முகத்தில், இப்படிஒரு படத்தை எடுத்திருக்கிறோமே,ஓடுமா, ஒடாதாஎன்கிற கவலைதான் தெரிகிறது...!

தமிழனின்பெருமை அறைகுறை ஆராய்ச்சியிலும்,ஆரவாரமான தற்பெருமையிலும்இல்லை. இது காசுக்காக,காசுள்ளவர்கள்,தமிழர்களை மேலும்சுரண்டுவதற்காக எடுத்தகமர்ஷியல் படம்.. இதைஎடுத்த, நடித்ததமிழர்களுக்கும் இதனால்பெருமை வரப்போவதில்லை.பார்க்கும் தமிழர்களுக்கும்பெருமையும், எழுச்சியும்வரப்போவதில்லை.

எல்லாம் சிவபயம்

2011-10-28T08:08:00.000-07:00

வெற்றுச்சுவரைப்பார்க்கின்றேன்

முற்றுமுணரும்நிலைவேண்டி

கற்றதுவெல்லாம்காய்ந்துப்போக

இற்றதுஎண்ணம்என்றேயாக 4

முடிவும்முதலும்இல்லாத

முடிச்சுப்போட்டமூலமெது?

மூளையின்மூச்சுமுட்டும்மட்டும்

மூலைகள்தோறும்தேடுகிறேன்.. 8

அதுவாஅவராஜடமாஉயிரா?

எதுவுமில்லாசூனியமதுவே

விதையொன்றாகிவிளைநிலந்தேடி

விந்தையுலகைஎட்டிப்பார்த்து 12

வினைகளமாடிவிதிமுடிவாலோ

வருமுதிர்வாலோவிழுந்தபின்னர்

மீண்டுமதுவாய்மறைவதுதானே

மீண்டும்மீண்டும்காணுமியற்கை? 16

இடையில்வாழ்கை!எத்தனைநித்திரை?

தொடர்ந்தகனவுகள்? தொய்ந்த நினைவுகள்!

விழித்தகணங்களும்எத்தனை வேதனை?

விழுந்துஎழுந்தகதைகள் ஆயிரம் 20

அழுதகண்கள்அதுபல்லாயிரம்

கேட்டாலுந்தன்பழவினையென்பார்.

இருந்தபிறப்புகள்யாரேஅறிவார்?

எல்லாம்கடந்தவன்நாடகமென்பார். 24

சுழற்சியில்லாநிலையினைநாடு

சுத்தப்பிரமஜோதியைகூடு

பிறவிகளில்லாபெருநிலைதேடு

துறவினைநாடிஅடைவாய்வீடு 28

காலந்தோறும்ஞானிகள்ஜாதி

ஞாலத்தோர்க்குஉரைத்தபாடம்

அவனேஎழுதிஅவனேநடத்தி

அவனேகளிக்கநடக்கும்கூத்தெனில் 32

எதற்காயித்தனைநாடகம்செய்தாய்?

இறைவாஎன்றுகேட்கத்தோன்றி

அதையுமறிவுகழித்துப்போட்டது

இறைபொருளென்னஆணவக்குறியா? 36

விதையில்லாதவிருட்சமில்லை

இயற்கையின்நியதிஇதுவேயாகில்

இறைக்கும்,வித்து இருக்குமன்றோ?

முதலில்லாமல்முடிவும் உண்டோ? 40

அகன்றுவிரியும்அண்டம் தொடங்கிய

அணுவின்முதலும்,பூஜ்ஜியநொடித்துளி
தொடங்கி,இன்றும் முடியாப்பயணம்

தொடரும்,முடிவில் காலக்கோடும் 44

ஜனித்தவேளை,கடவுள் என்னும்

கருத்தும்ஒன்றாய் உதித்தவேளை!

காலம்என்னும் அருவப்பொருளும்

காணும்அண்ட உருவப்பொருளும் 48

தானேநிகழ்ந்ததற்செயல்அற்புதம்!

ஏனோதோன்றுதுஎனக்குள்ளாக.

ஆனால்படித்தபடிப்பும்பயமும்

ஊனில்கலந்தஉலகியல்வழக்கும் 52

ஒத்துப்போகச்சொல்வதினாலே

செத்துப்போகசிந்தனையெல்லாம்

சத்தியமாகச் சொல்வேனெந்தன்

சித்தமெல்லாம் சிவபயமே! 56

மீண்டும் வேண்டும் சுதந்திரப் போர்

2011-10-18T09:45:00.000-07:00

[ கால ஓட்டத்தில் சில மனதுக்குப் பிடித்த விஷயங்களை, நேரமின்மை என்கிறஒரு சுய நொண்டிச் சமாதனத்திலே, தள்ளிப்போடுகிற குணம் எல்லோருக்குமே இருக்கிறது. எனக்குக்கொஞ்சம் அதிகமே. ஆனாலும், இந்த கவித்துவ வெளிப்பாடு, கடந்த ஆண்டுமுதல் எல்லோரையும்பரபரப்பாகி, இப்போது முழுவதுமாக ஓய்ந்துவிடாமல், ஆனால் வெகுவாக மந்தமாகி, மரணப்படுக்கைக்குத்தள்ளப்பட்டிருக்கிற, 2G முதல் மற்ற எல்லா ஊழல் செய்திகளுக்குக்கிடையில், ஆற்றாமை காரணமாகஎழுதப்பட்டது. ஆனால், எழுதி என்ன பயன் என்ற எண்ணத்திலே இங்கே இடுகையாகப் பதியாமல் போனது..!மக்களின் மறதி மண்ணாகிப் போகாமலிருக்க, இது போன்ற ஆதங்க வெளிப்பாடுகள் தேவை என்கிறஎண்ணம் இன்று இதை தற்செயலாக மீண்டும் படிக்கையில் ஏற்பட, இதோ கொள்வாருக்காக விரிக்கப்படுகிறகவிதைக் கடைச் சரக்கு! ]

மீண்டும் சுதந்திரப் போரினைச் செய்வோம்

அடிமைப் புத்தியின் அசதியைத் தொலைத்து

மாண்டநம் முன்னோர் உயிர்விலை விளைத்த

விடியலை வீணாய் செய்து விடாமல்!

அன்னிய உருவிலே, அடக்கு முறையிலை

ஆனால் இங்கே எத்தனை தளைகள்?

அன்னிய மொழிமுதல் அனைத்து கலப்பையும்

ஊனாய் உயிராய் உவந்து விட்டோம்!

தாலிகள் கோடியில் தாரை வார்த்தித்

தாலியின் கைகளில் கொடுத்து விட்டோம்

தொகைபல கோடியில் இருந்தும் தலைமைத்

தகைமை கொண்டோர் ஒருவரும் இல்லை!

தொகைபல கோடியில் சேர்ப்பதும் அரசியல்

பகைவரை அடியொடு அறுப்பதும், மக்கள்

மனங்களில் ஆயிரம் பிரிவுகள் விதைப்பதும்

வனங்களில் வாழ்பவை போல்நிலை ஆக்கலும்

ஆள்பவர் இங்கே ஆடிடும் ஆட்டம்

ஆட்டின மக்கள் பாடுதிண் டாட்டம்

பிணங்கள் தின்னும் சாத்திர மெல்லாம்

பேய்க்குணம் கொண்ட மக்களி னாலே

ஆள்பவர் வழியிலே மாக்களாய் ஆவதா?

தோள்வலி குன்றிநாம் தோல்வியில் துவள்வதா?

நம்மொழி நம்மினம் நம்கலா சாரம்!

நாவிலே நயம்பட நவிலத் தானா?

அன்னை மடிதனை அறவே மறந்து

அவலப் பிறப்பாய் திரியத் தானா?

என்பெலாம் கூசிடும் உணர்வுகள் இற்றதா?

எண்ணவும் இயலாச் செயலுமொ ழிந்ததா?

அரசியல் பிழைத்தால் அறமே கூற்றென

அருந்தமிழ் இளங்கோ அறிந்ததும் பொய்யா?

வாய்மை வெல்லும் என்னும் வாசகம்

வாய்-மெய் தனைவெலும் என்றோ வாகிடும்?

அரசிடம் தொடங்கி, அடித்தள மக்கள்

அனைவரும் சமமென ஆச்சுது ஊழலில்

கல்வியில் தொடங்கி கார்ப்பரேட் வரையில்

பாழும் பணமே பாயுது வெள்ளமாய்

கலைகள் எல்லாம் காசில் மாசாய்

குலைந்து போனது குப்பை மேடாய்!

மக்கள் உணர்வில் மறத்துப் போனார்.

சுவாசம் மறந்து மரித்துப் போனார்.

ராமன் வந்தே ஆண்டால் என்ன?

ராவண னால்நான் மாண்டால் என்ன?

மணியடித் தாலே கிடைக்குது சோறெனும்

மானங் கெட்ட வாழ்வே போதும்!

என்றே இருந்தால் எங்கே வாழ்வு?

எத்தனை நாட்கள் இத்தனைத் தாழ்வில்?

எழுமின் எழுமின் என்னுயிர் மக்காள்

கழுவில் கிடந்த நாட்களைத் தொலைத்து

உழுமின் உள்ளச் சிந்தனை நிலத்தை

பழுதில் எண்ணம் வளர்ப்பீர் உளத்தில்

அரசியல் அவலம் அடித்தளம் அரிக்கும்

கரையான் போல! அறிவீர் அறிவீர்

புரையோ டிப்போய் புழுத்து விடாதீர்.

உரமுடன் உள்ளத் துடிப்புடன் எழுவீர்

சூரியன் பெயரால் சூழ்ந்திடும் இருளை

வீரியங் கொண்டு விரட்டுவோம் வாரீர்!

சூழ்சியில் மக்களை சுரண்டிடும் கேடரும்

வீழ்ந்திட, விடுதலை பெற்றிட வாரீர்!

அயலான் நம்மை அடிமைப் படுத்த

அழகாய் வகுத்த, பிரித்தே ஆளும்

சூழ்ச்சிப் பின்னலை பிடித்துக் கொண்டார்

சூதினை நம்முள் விதைத்து விட்டார்

சூதை வென்று தருமம் வெல்ல

பாதைக் காட்டி கீதை தந்த

பார்த்தன் சாரதி கண்ணன் கனிவுடன்

பார்த்தருள் புரிவான் பாரதம் விழித்திடும்

அதுவரை சுதந்திர வேள்வித் தீயை

அணைய விடாதீர் ஆருயிர் நண்பீர்!

நம்பிக்கை - உணர்தல்

2010-01-19T04:35:00.000-08:00

இந்த நாள், இனிய நாள் என்று எல்லா நாட்களையும் தொடங்குவது, ஒரு எண்ணம். ஆனால் இந்த நாள் அன்று போல் இன்பமாய் இல்லையே என்று ஏங்குவதும், அந்த நாள் இனி வருமோ என்று வாடுவதும், என்றுதான் உண்மையான விடியலோ என்ற புலம்பலும்தான் வாடிக்கையாகி விட்டது.

சன் டீவியில் வரும் மிகவும் குறைவான நல்ல நிகழ்ச்சிகளில், அதிகாலையில் வரும், "இந்த நாள் - இனிய நாள்”, ஒரு சுவையான, பயனுள்ள நிகழ்ச்சி. மறைந்த தென்கச்சி கோ. சுவாமிநாதனும், தற்போது சுகி. சிவமும் நல்ல செய்திகளைப் பயனுள்ள வகையிலே சொல்லி வருகிறார்கள். இந்த வாரத் தொடக்கத்தில், நம்பிக்கை - உணர்தல் என்பவற்றைப் பற்றிய சுகி. சிவத்தின் எண்ண வெளிப்பாடுகள் சிந்திக்கவைக்கும் செய்திகள். நம்முடைய அன்றாட வாழ்க்கையிலே புழக்கத்தில் இருக்கிற, நன்கு அறிமுகமான வார்த்தைகள். எத்தனைச் சொற்களை அவற்றின் உட்பொருளை அறியாமல், உணராமல் நாம் சொல்லாடல் செய்கிறோம் என்று என்னை உணரவைத்த மணித்துளிகள் சுகி. சிவம் பேசிய தருணங்கள்.

நம்பிக்கை, உணர்தல் என்பவை இரண்டுமே தனிமனித அனுபவங்களாகக் கொள்ளப்பட்டாலும், நம்ப வைப்பதும், நம்புவதும், பிறர் ஊக்கியோ, அல்லது சுய சிந்தனையில் பிறந்த முடிபினாலோ ஏற்படுபவை. நான் அல்லது நாங்கள் நம்புவதை நீயோ, நீங்களோ, பிறரோ நம்பவில்லையானால், பிணக்கும், மனக்கசப்பும், சமயங்களில் சண்டைகளும் ஏற்பட்டுவிடுகின்றன.

கடவுள் நம்பிக்கை, கடவுள் இல்லை என்ற நம்பிக்கை, சமய நம்பிக்கை, சாதி நம்பிக்கை, கருத்தில் நம்பிக்கை, காதலில் நம்பிக்கை, தலைவனில் நம்பிக்கை என்று எல்லாமே கட்சிகட்டும் விவகாரங்கள், மற்றும் அடிப்படையிலே பிரிவினை ஏற்படுத்துபவை. ஒன்றுபடுத்துவது போல தோன்றி, கூட்டங்களைச் சேர்த்து, உன்பலமா, என்பலமா என்று தோள் தட்டுபவை.

உணர்தல் என்பது உள்ளொளி பெருகுதல், நம்பிக்கை உள்ளிட்ட அத்தனை மாயங்களும் அருகுதல்; உள்ளுக்கு மெய்யைக் காட்டும் தரிசன வாயில். உணர்ந்தபின் உவகை, உணர்ந்தவரோடும், அல்லாதவரோடும், சமநோக்குடைமை, கண்டவர் விண்டிலராகும் தன்மை இவையெல்லாம் தானாகவே அமைகின்றன. ஏனென்றால் உணர்ந்தவர் உணர்வது ஒன்றுதாம். சொல்லுக்கடங்கா, வேற்றுமைகளும், சுயபுத்தி என்கிற ஆணவமும் அடங்காத மனங்கள் உண்மையின் தரிசனத்துக்குப் பண்படாதவை, தொலைவில் உள்ளவை. நான், எனது என்பவை ஒழிந்தாலே, அதன் விளைவாம் கட்சிகூட்டல்களும் அழிந்து, சுயதரிசனத்துக்கும், உண்மையின் தேடலுக்குமான பக்குவம் வந்துவிடும்.

எனக்கும் கூட சிந்திப்பது எளிதாக செயலாக்கம் கடினமாக உள்ள ஒன்று இது. இதற்காகத்தான் சொன்னார்களோ... ? “ஆசையறுமின்கள், ஆசையறுமின்கள்.. ஈசனோடாயினும் ஆசையறுமின்கள்: என்று?

சென்னயில் கச்சேரி ஸீஸன் 2009-2010

2009-12-31T22:07:00.000-08:00

ஜனவரி ஒன்று, 2010:

அமெரிக்காவிலிருந்து கிளம்பும் போது, ஏதோ எல்லா கச்சேரிகளுக்கும், செல்லப்போவதாக நிச்சயம் செய்துகொண்டு வந்தாலும், சென்னை போக்குவரத்து நெரிசல்களும், மற்ற வாகன வசதி சிக்கல்களும், உறவினர் வருகைகளும், அழைப்புகளும் ஒட்டுமொத்தமாக நேரத்தை ஆக்ரமிப்பு செய்து கொள்ள, முடிந்த நேரத்தில் செல்லக்கூடிய கச்சேரிகள் மிகவும் குறைவுதான்.

இந்தவருடம், சௌமியா, டி.என்.எஸ், க்ருஷ்ணா, சஞ்சை, அஷோக் ரமணி, சங்கர நாராயணன் இவர்களின் கச்சேரிகளுக்குத்தான் செல்ல முடிந்தது... தவிர சில உதிரி ஆய்வு விரிவுரைகள்-விளக்க நிகழ்வுகள், குறிப்பாக எஸ்.ஆர்.ஜானகிராமன் அவர்கள் பார்த்தஸாரதி அரங்க நிகழ்ச்சி, என்று சில்லரை சில்லரையாக நிகழ்ச்சிகள்.

சௌமியாவின் சென்னை ம்யூஸிக் அகாதமி கச்சேரி மிகவும் நிறைவு. அதிகம் பாடப்படாத கோரி ஸேவிம்பராரே (கரஹரப்ரியா) அழகாகப் பாடப்பட்டது.. அதிக ஆர்ப்பாட்டமில்லாத கச்சேரி.

நாரதகான சபாவில், டி.என்.எஸ் அவர்களின் கச்சேரி, நிறைவான ஒன்று. ஆள் இளைத்தாலும், இசையில் இளைக்காத, இளமை உள்ளவர் சேஷூ. அவ்ர் எடுத்துக்கொண்ட பெரிய உருப்படி சிந்தாமணி ராகமும், ஸ்யாம ஸாஸ்த்ரியின் "தேவி ப்ரோவ" க்ருதியும்தான். அவரால் மட்டுமே செய்யமுடிந்த செயல், அந்த ராகத்தை அவ்வளவு விரிவாகப்பாடியது.

டி.எம்.க்ருஷ்ணாவின் அகாதமி கச்சேரி, வேகமும், விவகாரமும் நிறைந்த, கைத்தட்டல்களை அள்ளிக்கொண்ட கச்சேரி. பாபனாசம் சிவனின், அப்பன் அவதரித்த கதாம்ருததில் பாடிய மின்னல் ஸ்வரப் பின்னல்களுக்குப் பிறகு பாடிய தோடி கொஞ்சம் சுமார் ரகம்தான். ப்ருந்தாவன ஸாரங்க க்ருதியான சௌந்தர்ராஜத்துக்கு பாடப்பட்ட ராக ஆலாபனை மிகவும் சுமார் ரகம்தான்.. க்ருஷ்ணா ரொம்பவும் பேசுகிறார். ரசிகர்களின் கூட்டம் இன்று இருக்கும், நாளைக்கே வேறு திசைக்கு மாறிவிடும்.. வித்யா கர்வம் நியாயமானது என்று வாதிப்பவர்கள் பலர் இருந்தாலும், வித்தைக்கு அழகு வினயம்..

சஞ்சய் நன்றாகப் பாடுகிறார், குரல் சிறிது கனைசலாக இருந்தாலும். அன்று பாடிய ஆபோகி நன்றாக இருந்தது.. ஆனால் கோபால க்ருஷ்ண பாரதியின் "சபாபதிக்கு" தேவலாம் ரகம். ஆகிரி நல்ல முயற்சி.. ஆனால் வந்தது வராமல் பாடுவது கஷ்டம்தான்.. அகாதமி கச்சேரியில் அவருக்கு குரல் கொஞ்சம் படுத்தல். அதனாலேயே நிறைய ஸ்ருதிக்குற்றங்கள், தவறல்கள்..

இவர் எம்.டி.ஆர் மாதிரி பாடுகிறார்.. கல்யாணராமனாய் மாறிவிடுகிறார். ஏன் அவரைப்போல பாடமாட்டேன் என்கிறார்? சஞ்சய், நீங்கள், நீங்களாகப் பாடுவதே பிடித்திருக்கிறது..

அஷோக் ரமணி, இவர் குரலில் கொஞ்சம் சிரமம் இருக்கிறது. மேல் ஷட்ஜத்தில் சேரும் சமயங்களில் தேய்தல் இருக்கிறது.. ஆனால், அபரிமிதமான ஞானமும், தாளக் கட்டுப்பாடும் அமைந்த பாட்டு இவருடையது. காம்போஜியில் பாடிய மரிமரி நின்னே, கச்சேரி மேடைகளில் மிகவும் அபூர்வமாகப் பாடப்படும் க்ருதி.. மிகவும் நிறைவாகப் பாடினார். அவர் பாடிய பல்லவி திஸ்ர ரூபகம், ஸங்கீர்ண நடை (இதை உறுதிப்படுத்திக்கொள்ளவேண்டும்). மிகவும் கஷ்டமான ஒன்று.. மிகுந்த கவனத்துடன் பாடினார். ஷண்முகப்ரியா ராகத்தில் ஒரு இடத்தில் ஸ்ருதி விலகிய உடனே, அதை அவசரமாக முடித்துவிட்டால் போல பட்டது...! கூட்டிக் கழித்துப் பார்த்தால் நிறைவான கச்சேரி... ஆனால் கூட்டம்? நம் ரசிகர்கள் ஆர்பாட்டத்துக்கும், ஆரவாரத்துக்கும் ஆர்.எம்.கே.விக்கும் தான் கூடுவார்கள் போலிருக்கிறது...!

டி.வி.எஸ்.. விவகாரங்கள் குறைந்த, இசையனுபவம் மட்டும் மிகுந்த சுகமான கச்சேரி...

இன்னும் கச்சேரிகள் இருக்கின்றன செல்வதற்கு, ஊருக்குக் கிளம்புவதற்குள்.. மீண்டும் எழுதுகிறேன் ஊருக்கு வந்தவுடன்..!

இன்றைய சிந்தனை..

2009-12-31T21:17:00.000-08:00

புத்தாண்டு ஹைக்கூ:

பிச்சைக்காரர்கள் - கோவிலுக்கு உள்ளேயும், வெளியேயும்...!

ரொம்ப நாளாச்சு.. மறந்தே போச்சு..

2009-11-10T10:38:00.000-08:00

வலைப்பூ பக்கம் வந்து ரொம்ப நாளாச்சு. எழுத்தே மறந்துவிடும் போல ஆகிவிட்டது. என்ன செய்வது..? அன்றாட வாழ்க்கை அலுவல்கள், அலுப்புகள் ஆக்ரமிப்பு செய்துவிட்ட நிலையில், வெற்று ஆர்வம் மட்டும் என்ன செய்யமுடியும்?
எழுத எத்தனையோ இருந்தாலும், இப்போதைக்கு ஒரு கவித்துவமான வெளிப்பாடு மட்டும்…! இது ஒரு பொது நிலை வெளிப்பாடுதான். எல்லோருக்கும், எண்ண அளவிலாது கடந்து செல்லக்கூடிய நினைவுதான். தவறான வெளிப்பாடு என்பவர்கள் தவிர்க்கலாம் – உண்மையானவர்கள் முகத்திலில் ஒரு சிறு புன்னகை வரலாம்….! முதல் காதல் இல்லாத உள்ளமே இருக்காது.. அதுவே முடிவான காதலாய் கொண்ட உள்ளங்கள், இதைப் படிக்க வேண்டாம்..! வாழ்ந்து முடிந்து, வயோதிகத்தில் அசைபோடும் நினைவுகளில் இதுவும் இருக்குமே!

“முதல் காதல்”
மூவாறு வயதினிலே முகிழ்த்தது என் முதல்காதல்
முதுமையதன் வாசலிலும் முகங்காட்டி முறுவலிக்கும்.
என்றோவென் எண்ணத்திலே ஏறிவிட்ட அவள் நினைவு
என்றென்றும் என்னுடனே இதயத்தில் பயணிக்கும்.
தூரங்கள், தேசங்கள், புதிதான நேசங்கள்
சுமையான பாசங்கள், சுமந்துவந்த வாசங்கள்
முதலென்று அறியுமா? முடிவைதான் அறியுமா?
மூச்செல்லாம் அவளென்று இருப்பதைத்தான் புரியுமா?
அவள்நினைவு கீற்றாக மனத்திரையில் ஓடுகையில்
அகம்நிறையும்- அண்ணாந்து பார்த்துகண் விழிப்பனிக்கும்!
பிறவுறவில் இருந்தாலும், பிழையென்று சொன்னாலும்,
அறமுறைக்கிது அடுக்காது விழைவதுவும் வீணாகும்,
என்றெல்லாம் தெரிந்தாலும், என்மனத்தின் ஓரத்தில்
என்றைக்கும் தங்கிவிட்ட ஏக்கம்தான் என்செய்யும்?
தேகத்தின் தாகத்தை தீர்ப்பதற்கா இக்காதல்?
மேகத்தில் கருமுகிலாய் கனப்பதற்கா இக்காதல்?
இதயத்தின் கருவறையில் காதலையே தெய்வமென
உதயத்தில் தரிசிக்க உள்ளத்தில் பூட்டிவைத்தேன்
எங்கிருந்தாலும் வாழ்கென்று வாய்சொன்னாலும்
என்னவளே என்னிதயத்தில் என்றைக்கும் வாழ்வாயா?

பொன்னியின் செல்வன் நாடகம் - ஒரு பார்வை

2009-11-10T10:06:00.000-08:00

இந்திய துணைக்கண்டத்தின் வரலாறு மிகவும் வியக்கத்தக்க ஒன்று. கலைவழி பண்பட்ட கடந்தகாலச் சரித்திரத்தின் சுவடுகள், நமது பெருமை மிக்க முன்னோர்களின் ஆழ்ந்த அறிவாற்றலையும், அவற்றால் விளைந்த அற்புத வெளிப்பாடுகளையும் உன்னத காவியங்களாகவும், ஏனைய நாகரிகங்கள் போலல்லாமல், பொதுமக்களின் நல்வாழ்வோடு இயைந்த கலைச் செல்வங்களாகவும் இன்றும் நமக்குக் காட்டிக்கொண்டிருக்கின்றன.

அவற்றின் பெருமைகளை உணர்ந்து, அவற்றின் நீட்சியாக இன்றைய சமுதாயத்தை நடத்திச் செல்லவும், குறைந்தபட்சம் அவற்றைப் பாதுகாத்து வருங்கால சந்ததியினருக்கு விட்டுச்செல்லவும் கூட இன்றைய போக்கு இடமளிக்காமல் இருப்பது ஆழ்ந்த சோகத்தையும், கவலையையும் தந்தாலும், அங்கொன்றும் இங்கொன்றுமாக சிலரது தணியாத ஆர்வத்தினால், அப்பொக்கிஷங்கள் முழுவதும் அழிக்கப்பட்டும், மறைக்கப்பட்டும் விடாமல் காப்பாற்றப்பட்டு வருகின்றன.

பல்லவப் பேரரசும், பின்னால் வந்த சோழர்களும், பிற்கால நாயக்கர்களும், தஞ்சை மராத்தியரும், கலைகளை வளர்ப்பதிலும், கலைஞர்களை ஊக்குவிப்பதிலும் காட்டிய அக்கறையின் அகச்சான்றாக, அக்காலத்திய அறிவுப்பொக்கிஷங்கள் ஓலைசுவடிகளாகவும், உயர்ந்து நிற்கும் தென்னகக்கோவில்களாகவும் பிரதிபலிக்கின்றன இன்றும்.

பெருவுடையார் ஆலயம் என்று தஞ்சையில் சிறந்த சிற்பக்கலை சின்னமாக, ராஜராஜ சோழனின் ஆட்சியின் உன்னத வடிவமாக உயர்ந்து நிற்கும், பெரிய கோவிலும், அதைப்போன்ற நூற்றுக்கணக்கான கோவில்களும் தமிழரின் பொற்கால கட்டிடக்கலைச் சிறப்பை இன்றும் உரத்துச் சொல்கின்றன.

சரித்திர ஆராய்ச்சியாளர்களுக்கும், சரித்திரக் கதை புனைவோர்களுக்கும், வியப்பையும், கற்பனையயும் ஒருங்கே தரக்கூடிய அமர சின்னங்கள் அவை.

அமரர் கல்கி ரா.கிருஷ்ணமூர்த்தி, தமிழக சரித்திர வரலாற்றுக் கதை ஆசிரியர்களில் முதன்மையானவர், முக்கியமானவர். அவருடைய சிவகாமியின் சபதமும், பொன்னியின் செல்வனும், அவற்றில் உலவிடும் பாத்திரங்களும், சரித்திர ஆர்வலர்களையும், ஏன், ஆராய்ச்சியாளார்களையும் கூட பல்லவ, சோழ பேரரசுகளின் காலம் இப்படித்தான் இருந்திருக்க வேண்டும், இந்த மனிதர்கள் எல்லாம் உயிரோடு, இரத்தமும் சதையுமாக மாமல்லபுரத்திலும், வாதாபியிலும், தஞ்சையிலும், இலங்கையிலும் உலவி வந்திருக்கவேண்டும் என்றே எண்ணவும், நம்பவும் வைக்ககூடியவை..

செப்பேட்டு, கல்வெட்டு குறிப்புகளிலிருந்தும், சிறந்த ஆராய்ச்சியாளர்களின் ஆய்வுகளிலிருந்தும் பெறப்பட்ட தகவல்களை அமரர் கல்கியின், ஈடு, இணையற்ற, கவித்துவமான கற்பன நயத்தோடு, உயிரோடு உலவிய பாத்திரங்களோடு, கற்பனைப் பாத்திரங்களையும் இணத்து புனையப்பட்ட அமரகாவியங்கள் இரண்டு நாவல்களுமே.

பொன்னியின் செல்வனின் சிறப்பு என்னவென்றால், கதைத்தலைப்பின் நாயகன், கதாநாயகன் இல்லை! கதாநாயகன் வந்தியத்தேவன் ஆனாலும், கதை இறுதியில் உத்தமச்சோழ சக்ரவர்த்தியின் மணிசூட்டு விழாவோடு நிறைவு பெறுகிறது. இந்த விசித்திர கதையமைப்பு, சரித்திர நிகழ்வோடு ஒத்துப்போவதானலும், இதற்கு முன்பும், பின்பும் இல்லாத காவியமரபு.

இந்த முரண் மரபே, திரைக்கதை ஆசிரியர்களையும், நாடகமாக்குவோரையும் சிறிது குழப்பகூடும். கதையில் வரும் ஏறக்குறைய அறுபது கதாபாத்திரங்களையும், பல்வேறு இடங்களையும், நம்பகமான முறையிலே வெளிக்கொணர்வது பெரும் பொருட்செலவு மட்டுமல்லாது, தயாரிப்புக்கும், கதை சொல்லும் நேர்த்திக்குமே பெரிய சவால்கள்.

ஸான்ஃப்ரான்ஸிஸ்கோ வளைகுடா தமிழ் மன்றமும், நாடகவடிவமாக்கி, இயக்கிய பாகீரதி சேஷப்பனும், அவருடைய தயாரிப்பு நிர்வாகக் குழுவும், நடிகர்களும் இந்த சவால்களை சந்தித்தது மட்டுமல்லாமல், அவற்றைக் கடந்து சாதித்திருக்கிறார்கள்.

தயாரிப்பு நிர்வாகத்திலும், காட்சி வடிவமைப்புகளிலும் ஸ்ரீதரன் மைனரும், வேணு சுப்ரமணியனும் ஆற்றிய பங்கு உண்மையிலேயே பாராட்டப்படவேண்டிய ஒன்று. காட்சிகளை வேகமாக நகர்த்துவதில், நடிக, நடிகையர்களை, காட்சிகளுக்கு மேடையில் குறித்த நேரத்தில் இருத்தியதில் பல்லவி நாகிரெட்டியின் சிரித்த முகத்திற்கு சிறப்பான பங்கு உண்டு.

தடுமாற்றங்களும், வசன மறப்புகளும், தொழில்வழி நாடக நடிகர்களுக்கே நேர்வதுதான். ஆனால் எப்படி சமாளிக்கிறார்கள் என்பதே முக்கியம். நம்முடைய வளைகுடா நடிகர்கள், தங்களுடைய ஆர்வங்காரணமாக, சொந்த வேலைகள் மிகுந்த வார இறுதிகளை தியாகம் செய்தும், அலுவலக நெருக்கடிகள், வீட்டோர் அலுத்துக் கொள்ளல்கள் இவற்றை சமாளித்தும், நாக்கை உருட்டி, பிறட்டி போடக்கூடிய தமிழ் வசனக்களை, உச்சரிப்பு, ஏற்ற இறக்கங்கள் கெடாமலும், மிகவும் நேர்த்தியாக நடித்தது மட்டுமல்லாமல், ஏறக்குறைய அறுநூறுக்கும் மேற்பட்ட, நாடக ரசிகர்களை ஏறக்குறைய நான்கு மணி நேரத்திற்கு கட்டிப்போட்டது ஒரு உயரிய சாதனைதான்!

“தங்கத்திலே ஒரு குறையிருந்தால் அது தரத்தினில் குறைவதுண்டோ”?

பாகீரதி சேஷப்பன் சொன்னது போல, சரித்திர நாடகத்தினை, தூயத் தமிழ் வசனங்களோடு, இத்தனையாயிரம் மைல்களுக்கப்பால் அரங்கேற்றும் போது, அதற்கு உண்டான வரவேற்பினைப் பற்றிய சந்தேகங்களுக்கு, நேற்றைய இரசிகர் கூட்டம் உரத்துச் சொல்லிவிட்டது பதிலினை!

தலைமுறைகளைக் கடந்த, காவியம் இது என்ற அங்கீகாரத்தினை, அமரர் கல்கி வானுலகிலிருந்து பார்த்து, கண் விழிகள் பனித்துக் கொண்டிருப்பார்!

ஆலிலை மேலொரு அழகிய பாலகன்

2009-06-20T21:47:00.000-07:00

ஏக்நாத் ஈஸ்வரன் (1910-1999) அண்மையில் நம்மிடையே வாழ்ந்து மறைந்த தன்னையுணர்ந்த தத்துவ தரிசி. இந்தியாவில் நாக்பூர் பல்கலை கழகத்தில் ஆங்கிலப் பேராசிரியராகப் பணிபுரிந்து, பின்னர் கலிபோர்னியாவின் பெர்க்லி பல்கலைக் கழகத்து ‘ஃபுல் ப்ரைட் அறிஞராக”, (Fulbright Scholar) 1960-களில் வந்த அவர், நீலகிரி பிரசுரம் (Nilgiri Press), மற்றும் “நீலமலை தியான வளாகம்” (Blue Mountain Center of Meditation), முதலியவற்றை நிறுவி, ஆன்மிகம், தியானம், பகவத் கீதை, உபநிஷத்துக்கள், தம்மபாதா போன்றவற்றுக்கு விளக்க உரையாக, நிறைய புத்தகங்களை எழுதியுள்ளார்.

அவருடைய “தினசரி வாழ்க்கைக்கான பகவத்கீதை” தொடர் புத்தகங்களின் இரண்டாவது தொகுப்பான “ஆயிரம் சூரியர்களைப் போல” என்ற புத்தகத்தின் சில பகுதிகளைப் படித்துக் கொண்டிருந்தேன். அதில் மார்க்கண்டேயன் கிருஷ்ணனைப் பார்த்து, ‘மாயைப்” பற்றி விளக்கிக் கூறுமாறு கேட்க, நடக்கும் நிகழ்வுகளை, மிகவும் அழகாக, பிரமிப்பாக விளக்கியிருப்பார். அந்த விளக்கங்களை படித்தன் காரணமாக எழுந்த உள்ள எழுச்சியில் பிறந்த பாடல்தான் இதோ…! கவிதைக்கான முதல் காரணமான “உள்ள எழுச்சி” என்பதைத்தவிர மற்று இலக்கண விதிகளுக்கெல்லாம் உட்பட்டுள்ளதா என்று சிந்திக்காமல் எழுதிய வெளிப்பாடு இது…!

ஆலிலை மேலொரு அழகிய பாலகன்

கால்விரல் கனியிதழ் வாயினில் குலவிட

மாயங்கள் செய்கின்றான் – எல்லாமவன்

மாயயை என்றே சொல்கின்றான்.

ஆலமுண்ட நீலகண்ட ஆதிசிவ நாதன்

காலனை கடிந்தே கார்த்தமார் கண்டன்

காலமும் ஞாலமும் கடந்த மாயையின்

கருத்துரைக்கக் கேட்டான் – கண்ணனோ

கருத்தையே அழித்தான் – அகமாயக்

கருத்தையே அழித்தான் -

உள்ளிழுக்கும் மூச்சிலே உயிரெலாம் ஒடுங்கும்

உள்ளும் புறமுமென்ற உணர்வுமே அடங்கும்

எல்லாம் ஓய்ந்துவோர் எல்லையிலா மெளனம்

ஏகாந்தமாய் அங்கே நிலைபெறும் மோனம்

ஹூங்கார நிஸ்வாஸம் உண்டாக்கும் ப்ரபஞ்சவெளி

ஆங்கார மாயைதனை அழிக்கின்ற ஞானஒளி

இருவினை இருள்மாயக் களியினிலே களைப்பார்

கருமவினையில் இங்கே பிறந்திறந் திளைப்பார்-பின்

பரமயோக பாதன் பக்தியிலே திளைப்பார்.

எல்லாம் துறந்த துறவியருக்கும் இலக்கியமும், இலக்கணமும் துறக்கமுடியவில்லையே என்று நினைப்பதுண்டு. ஆசை அறுமின்கள், ஆசை அறுமின்கள், ஈசனோடாயினும் ஆசை அறுமின்கள் என்று ஒருபுறம் கூறிக்கொண்டே, அக்கூற்றையும் கவியாகச் சொன்னவர்கள் நம் துறவிகளும் ஞானியர்களும். கவிதை ஆசைமட்டும் எவரையும் விட்டதில்லை! இதற்குக் காரணம் எதுவாக இருக்கமுடியும்? சிந்திப்போம் அடுத்தமுறை சந்திப்பதற்குள்..

தாயுமானவ சுவாமிகள்

2009-06-18T21:12:00.000-07:00

வரகவிகள் வாக்கிலிருந்து பொழிகின்ற கவியமுதங்கள் உள்ளுக்குள் அவர்கள் உணர்ந்து, துய்த்த மெய்யமுதங்கள். பாரதியின் “பாருக்குள்ளே நல்ல நாடு” என்கிற கவிதையிலே, அவன் சொன்னது அத்தனையும் ஏதோ தன் உள்ளத்தில் பாரதநாடு எப்படி இருக்கவேண்டுமென்று நினத்து சொன்னதில்லை. வெற்றுப் பெருமிதத்திலே எழுதியவையும் இல்லை. நம் இலக்கியங்களும், முறிவுறாத சமய, கலை, கலாச்சார, மக்கள் வாழ்வு நெறி தொடர்வுகளைப் பற்றி விட்டுச்சென்றிருக்கும் அகச்சான்றுகளின் உண்மையினை உணர்ந்ததன் வெளிப்பாடே…

“ஞானத்திலே பரமோனத்திலே – உயர்

மானத்திலே அன்ன தானத்திலே

கானத்திலே அமுதாக நிறைந்த

கவிதையிலே உயர் நாடு” – இந்தப் (பாருக்குள்ளே)

…. …. … …. …. …. … …. …. …. … ….

யாகத்திலே தவ வேகத்திலே – தனி

யோகத்திலே பல போகத்திலே

ஆகத்திலே தெய்வ பக்தி கொண்டார்தம்

அருளினிலே உயர் நாடு – இந்தப் (பாருக்குள்ளே)

இக்கவிதைகாட்டும் உண்மைகள், காட்டாற்று வெள்ளத்தில் அடித்துச் செல்லப்படுவதைப் போல், அரசியல், சமயம், கலாச்சார. சமூகச் சீரழிவுகள் வேகமாக வளர்ந்து கொண்டிருக்கும் சூழலிலும், இன்றைக்கும் பாரத்தின் பல இடங்களில் சாதாராண மக்களும் உணருபவை. பாரத தேசம் முரண்பாடுகளின் மொத்த உருவமாக இருப்பதற்கு காரணம், சிறிது காலமாகவே “கலாச்சாரங்களின் கலப்பிடமாக” இருந்துவரும் அமெரிக்காவுக்கு முன்பாக, ஏறக்குறைய 5000-ம் வருடங்களுக்கும் மேலாக அனைத்து திசைகளிலிருந்தும் மென்முறையாகவோ, வன்முறையாகவோ வந்திறங்கிய கலாச்சார நுகர்வுகளுக்கும், திணிப்புகளுக்கும், பாரதநாடு ஆட்பட்டிருப்பதால்தான்.

முரண்பாடுகள் என்பதாலேயே மோசமென்று பொருளில்லை. ஒட்டுமொத்த பாரத்தின் முதிர்ந்த சிந்தனை வளர்ச்சியையும், வேற்றுமையிலும் ஒற்றுமை காணும் அடிநாதத்தையுமே அவை காட்டுகின்றன.

ஆதிசங்கரர், புத்தர் தொடங்கி சரித்திரத்தில் இடம்பெற்றுள்ள தவஞானியர் எத்தனையோ! சமய சிந்தனையைச் செழுமைப் படுத்தியதிலும், மக்களின் பொதுவாழ்க்கை ஒழுக்கநிலைக்கக் கரைபடிமங்களாகவும் விளங்கியதில் இவர்களின் தத்துவ தரிசனங்களும், அவற்றின் இலக்கியப் பதிவுகளும் முக்கிய பங்கை ஆற்றி வந்திருக்கின்றன. இவர்களின் சிந்தனைப் பதிவுகளை, அவற்றில் அவர்கள் கால அரசியலின் உரசல்களை, அவற்றின் முழு சாரத்தை, புரிந்துகொள்ள ஒரு பிறவி இருந்தால் போதாது. ஆனாலும் என்னால் இயன்றவரை, சில முக்கியமான சமயச் சிந்தனையாளர்களை அறிந்துகொள்ளும் முயற்சியிலே, தாயுமானவ சுவாமிகளின் பாடல்களைச் அண்மையில் படிக்க நேர்ந்தது.

தமிழ்மொழியின் வனப்பிலே, வளப்பத்திலே உள்ள பெருமிதத்திலும், பிரமிப்பிலும் மட்டுமே படிக்க ஆரம்பித்த எனக்கு, இந்த செல்வங்களையெல்லாம் கடந்த 100 வருடங்களில் வேகமாக இழந்துகொண்டிருக்கிறோமே என்னும் பதைப்பு தோன்றினாலும், இழப்பும், மீட்பும் சுழற்சியே என்கிற உலக விதியின் உண்மை ஆறுதலைத் தருகிறது.

தஞ்சை மாவட்டத்தில் வேதாரண்யம் என்று அழைக்கப்படும் திருமறைக்காடு (வேதங்களை வளர்த்த வனம்) என்னும் சிவத்தலம் ஊரிலே சுமார் முன்னூறு வருடங்களுக்கு முன்பாக, தஞ்சையை விஜயரங்கசொக்கநாத நாயக்கர் ஆண்ட காலத்திலே, சைவ வேளாளர் குலத்திலே தோன்றிய கேடிலியப்பப் பிள்ளை, கெஜவல்லி அம்மை தம்பதியர்க்கு முதல் மகனாய் பிறந்தவர் சிவசிதம்பரம். இந்த பிள்ளை கேடிலியப்பபிள்ளையின் தமயனாருக்கு சுவீகாரமாகக் கொடுக்கப்பட்டார்.

தஞ்சை அரசரிடம் சம்ப்ரதியாக (பிரதான கணக்கர்) வேலை செய்து வந்த கேடிலியப்பப் பிள்ளை வேலை நிமித்தமாக திருச்சிராப்பள்ளியில் குடிபெயர்ந்து வசித்துவந்தார். அங்கு எழுந்தருளியிருக்கும் ஈசனுக்கு தாயுமானவர் என்றே பெயர்.. அவ்விறையின் மேல் கொண்ட பக்தியினாலே, 1707-வருடத்தில் பிறந்த தனது இரண்டாவது மகனுக்கு தாயுமானவன் என்றே பெயரிட்டார்.

இள வயதிலேயே அறிவுத்திறம் மிக நிரம்பியவராக விளங்கிய, சிராப்பள்ளியிலே பாடசாலை நடத்திவந்த சிற்றம்பலதேசிகரின் மாணவராக இவர், தமிழ், சம்ஸ்கிருதம், கணிதம், ஜோதிஷம் முதலியவற்றை கோதற்று கற்று, நல்ல நிபுணத்துவம் எய்தினார். தந்தைக்குப் பிறகு அவர் தஞ்சை அரசரிடம் சம்ப்ரதியாகவே வேலை செய்துவந்தார். காலப்போக்கில் அவர் மனம் உண்முகம் நோக்கி திரும்பியதும், சிராப்பள்ளியில் அவர் “மௌன குரு” என்று அறியப்பட்ட ஒரு மகானைச் சென்றடைந்ததும், பிறகு கௌபீனதாரியாய் திருச்சிராப்பள்ளியிலேயே துறவறம் பூண்டதும், இறுதியாக இராமநாதபுரத்துக்கு அருகேயுள்ள லக்ஷ்மீபுரத்தில், நிர்விகல்ப சமாதி அடைந்ததும் வரலாறு.

ஸ்ரீ ராமக்ருஷ்ண தபோவனம், திருப்பராய்த்துறை (திருச்சிராப்பள்ளி மாவட்டம்) வெளியிட்டுள்ள தாயுமானவசுவாமி பாடல்கள் புத்தகமொன்று என்னுடைய புத்தகசேகரிப்பிலே வெகுநாட்களாகக் கிடந்தது. அண்மையில் அதை தூசிதட்டிப் படிக்கப்போக, “அடடா! இதை இத்துணை நாட்களாகப் படிக்காமல் விட்டுவிட்டோமே” என்று தோன்றியது.

தமிழ் ஞான மரபிலே வந்துள்ள எத்தனையோ ஞானிகளில், அருணகிரியார், வள்ளலார், பட்டினத்தார், பதினெண் சித்தர்கள், தாயுமானவ சுவாமிகள், போல எத்துணை மஹான்கள் எப்படியெல்லாம் கவிதைப் வெள்ளமாகப் பொழிந்திருக்கிறார்கள்?

கீழேயிருக்கும் பன்னிருசீர்க் கழிநெடிலடி ஆசிரிய விருத்தப்பாடலை படிக்கும் போதே, தாயுமானவரின் ஆத்ம விசாரணயின் அகண்டம் உடனே புலனாகிறது.

அங்குஇங்கு எனாதபடி எங்கும் ப்ரகாசமாய்

ஆனந்த பூர்த்தியாகி,

அருளொடு நிறைந்தது எது? தன்அருள் வெளிக்குள்ளே

அகிலாண்ட கோடியெல்லாம்

தங்கும்படிக்கு இச்சைவைத்து, உயிர்க்குயிராய்

தழைத்தது எது? மனவாக்கினில்

தட்டாமல் நின்றது எது? சமயகோடிகள் எலாம்

தம்தெய்வம் எம்தெய்வம் என்று

எங்கும் தொடர்ந்து எதிர் வழக்கு இடவும் நின்றதுஎது?

எங்கணும் பெருவழக்காய்,

யாதினும் வல்ல ஒரு சித்து ஆகி, இன்பமாய்

என்றைக்கும் உள்ளது எது? மேல்

கங்குல்பகல் அறநின்ற எல்லைஉளது எது? அது

கருத்திற்கு இசைந்தது அதுவே;

கண்டன எல்லாம் மோன உருவெளியது ஆகவும்

கருதி அஞ்சலி செய்குவாம்

திருவருள் விலாசப் பரசிவ வணக்கம் என்னும் தலைப்பிலே எழுதப்பட்டுள்ள மூன்று பாடல்களிலுமே, குறிப்பிட்ட தெய்வம் என்று குறிப்பிடாமல், தூய அத்வைத வஸ்துவைக் குறித்த விசாரணையும், அந்த துரியபரம்பொருளின் வணக்கமுமாக செல்கின்றன பாடல்கள். காலமாய், வெறும் வெளியாய் விரிந்திடும் அகண்ட ககனமெங்கும் காலம் காலமாய் தவழ்ந்திடும் அனந்தகோடி உயிர்களை ஆக்கி, காத்து, அழித்து அந்தச் சுழற்சி நாடகமாடும், எல்லைகளில்லாப் பரமனுக்கு அஞ்சலியே முதல் பாடல்.

ஊர் அனந்தம்; பெற்றபேர் அனந்தம்; சுற்றும்

உறவு அனந்தம் வினையினால்

உடல் அனந்தம்; செயும் வினை அனந்தம்; கருத்

தோ அனந்தம்; பெற்றபேர்

சீர் அனந்தம்; சொர்க்க நரகமும் அனந்தம்; நல்

தெய்வமும் அனந்தம்; பேதம்

திகழ்கின்ற சமயமும் அனந்தம்; அதனால் ஞான

சிற்சக்தியால் உணர்ந்து

கார் அனந்தம் கோடி வருஷித்தது என அன்பர்

கண்ணும் விண்ணும் தேக்கவே

கருதரிய ஆனந்த மழைபொழியும் முகிலை;நம்

கடவுளைத்; துரியவடிவைப்;

பேர் அனந்தம் பேசி மறை அனந்தம் சொலும்

பெரியமௌனத்தின் வைப்பைப்

பேசரும் அனந்தபத ஞான ஆனந்தம் ஆம்

பெரிய பொருளைப் பணிகுவாம்.

இரண்டாம் பாடலில் அனந்தமான வேற்றுமைகளைச் சொல்லி, அதில் ஞானானந்தம் தரவல்ல கடவுளை, மெய்ப்பொருளைப் பணியவேண்டும் என்று சொல்கிறார் தாயுமானவர். இந்த பாடல், நாம் சாதாரணமாக கவனிக்கிற செய்திகளைச் சொன்னாலும், தத்துவத்தேடலின் முதல் படிகளை, படிப்போர்க்கு காட்டுவதே பாடலின் சிறப்பு.

அத்வைத வஸ்துவை; சொல்ப்ரகாசத்தனியை;

அருமறைகள் முரசு அறையவே

அறிவினுக்கு அறிவுஆகி, ஆனந்த மயம் ஆன

ஆதியை; அநாதி; ஏக

தத்துவ சொரூபத்தை; மதசம்மதம் பெறாச்

சாலம்பரகிதம் ஆன

சாசுவத புஷ்கல நிராலம்ப ஆலம்ப

சாந்தபத வ்யோமநிலையை;

நித்தநிர்மல சகித நிஷ்ப்ரபஞ்சப் பொருளை;

நிர்விஷய சுத்தம் ஆன

நிர்விகாரத்தைத்; தடஸ்தமாய் நின்று ஒளிர்

நிரஞ்சன நிராமயத்தைச்

சித்தம் அறியாதபடி சித்தத்தில் நின்று இலகு

திவ்ய தேஜோமயத்தைச்;

சித்பர வெளிக்குள் வளர் தற்பரமது ஆனபர

தேவதையை அஞ்சலிசெய்வோம்.

இந்த மூன்றாவது பாடலில் மறுபடியும் இன்ன தெய்வம் என்று சொல்லாமல், பரதேவதைக்கு அஞ்சலியாகவே செய்துள்ளார். அந்த பரதேவதையை இரண்டிலாத பொருளாய், ஒங்கார/பிரணவப் பொருளாய், ஆதியாய், அநாதியாய், ஒன்றாய தத்துவாமாய், பற்றுக்கோடில்லாத (சாலம்பரகிதம்), என்றும் உள்ளதாய், நிறைவாய் (புஷ்கலம்), தன்னைக் கொண்டாட ஆதரவு தேடாத (நிராலம்ப ஆலம்பமாய்), அதாவது தன்னை எந்த சமயக்கட்சியிலும் சேராத தன்மையனாய், நிர்மலனாய் (அழுக்கற்றவனாய்), உலகிற்கும், அண்ட வெளிக்கும் அப்பாற்பட்ட பொருளாய், புலன்களுக்கு எட்டாதவனாய், வடிவற்றவனாய், முற்றொழில் மூலகாரணனாய் (தடஸ்தம்),

குற்றமற்றவனாய்(நிரஞ்சனம்), பழுதுபடாதவனாய் ((நிராமயம்) ) கூறுகிறார். அந்தப் பரம்பொருள் நம் சித்தம் அறியாதபடி, நம் சித்தத்தில் நின்று இலங்குமாம்.

முதிர்ந்த தேடலின் உதிர்வான இப்பாடல்கள், அந்தகாலக் கட்டத்தில், மொழி வேற்றுமையில்லாத வடமொழிச் சொற்களை மிகவும் இலகுவாக, தமிழ்க் கவிதையின் இலக்கணக் கட்டமைப்புக்குள்ளேயே ஆளும் தன்மையைத்தான் காட்டுகிறது. 15-ம் நூற்றாண்டில் வாழ்ந்ததாகக் கருதப்படும் அருணகிரிநாதரின் சொல்லாட்சியிலும், வடமொழிச் சொற்கள் விரவிக்கிடப்பதை பார்க்கலாம்.

மேற்கண்ட 3-வது பாடல், அருணகிரியாரின், “உருவாய் அருவாய், உளதாய், இலதாய்” என்கிற பாடலை ஒட்டியிருந்தாலும், இறைவனை, இவன் என்று கட்டம் கட்டாமல் பாடியிருப்பதிலிருந்து, அவரின் சமயம் தாண்டிய சிந்தனையையும், நோக்கினையும் காட்டுகிறது

பழுத்த சைவப்பிள்ளையான தாயுமானவர், தான் சார்ந்திருந்த சைவ சமயத்தைத் தாண்டிய சிந்தனகளைக் கொண்டிருந்தது, பிற்காலத்தவரான வடலூர் மகானான வள்ளலார் சுவாமிகளுக்கு, முன்னோடி என்றே கொள்ளலாம்..

இவருடைய துறவு எண்ணத்துக்கும், சமய சிந்தனை வளர்ச்சிக்கும், கவிதா மேதைக்குமான உந்துதலும், எழுச்சியும் எவரிடமிருந்து கிடைத்தது என்கிற கேள்வி தோன்றுகிறது! ஓரளவுக்கு அருணகிரியாரின் தாக்கம் இவருடைய பாடல்களில் தொனிக்கிறது..

எந்நாள்? கண்ணிகளில், அடியார் வணக்கம் பகுதியில் தேவார நால்வர்,பட்டினத்தார் பத்ரகிரியார், சிவஞான போதம் எழுதிய மெய்க்கண்ட சிவவாக்கியர், திருமூலர், அருணகிரியார் இவர்களை குறித்திருந்தாலும், குறிப்பாக,

“கந்தர் அநுபூதி பெற்றுக் கந்தர் அநுபூதி சொன்ன

எந்தை அருள்நாடி இருக்குநாள் என்னாளோ”

என்று அருணகிரியாரைக் குறித்துப் பாடியிருப்பதும், தன்னுடைய பாடல்களில், “சும்மா இரு” என்பதை மீண்டும் மீண்டும் சொல்லியிருப்பதும், இவர் அருணகிரியாரின் பாடல்களில் தோய்ந்திருந்தது தெரியவருகிறது. இவருடைய ஞானகுருவாக சிராப்பள்ளி மலையில் இவருக்குமுன் தோன்றி ஆட்கொண்ட மௌனகுருவும் அதுவே போதித்ததையும் படிக்கும் போது, இவருடைய குருவே அருணகிரியாராக இருக்கக்கூடுமோ என்று தோன்றுகிறது. அல்லது அருணை முனிவரின் குரு-சிஷ்ய பரம்பரையில் வந்திருக்காலாமோ என்றும் நினக்கத்தோன்றுகிறது .

எழுத ஆரம்பித்தால்வளர்ந்துகொண்டிருக்கிறது. மகான்களைப் பற்றி, படிப்பதற்கும், பகிர்ந்துகொள்வதற்கும்ஏராளமான செய்திகள்இருக்கின்றன. இருந்தாலும், இப்போதைக்கு இவ்வளவில் முடித்துக்கொண்டு, தாயுமானவர்பாடல்களைப்படிக்குந்தோறும், பகிர்ந்துகொள்ள மீண்டும்எழுதுவேன்…!